first two weeks

Welcome to Ananda’s Blog J

Finally I have a little time to start my blog! I’m sorry fort he big delay!

But to make it quicker I’ll write in german, although it’s strange form e, because I speak English all the time ;)

First things first!

Am Dunnstig 3.1.13 het mini Reis gstartet! Han mis Zimmer ganz leer hinter mir glah und bin mit mine liebe Lüüt zum Flughafe (danke fürs warte und mitcho J). De Flug isch mit Stop in Dubai und Zwüschehalt in Sydney uf Auckland gange, mitere Gsamtziit vo 25 Flugstund! Phuhhh ja, so han ich mich danach au gfühlt! Es isch zwar alles super gloffe, han immer sehr liebi Lüüt nebet mir gha, aber nach 14h flüge hani mal s’Gfühl gha ich chan nüme länger sitze, mis Hinterteil het so weh tah, zum Glück hanis denn doch irgendwie gschafft ;)

In Auckland het mich denn mini tolli Gastfamilie (pünktlich) scho erwartet! Da mis Schätzeli (Jasmin) scho mal bi dere Familie gsi isch, han ich scho gwüsst, dass ichs det super ha wird. Und so isch es au! Mini Gastmuetter Leigh isch mega lieb und hilfsbereit, ihre Ma de Mike au und die zwei Kinde Maja und Metthew sind super süess!

Am Sunntig hät mich d’Leigh bereits zu ihrne Eltere mitgnoh und denn de Weg zur Schuel zeigt. Bin natürlich sehr froh gsi, da ich am Mäntig am 8:30 scho han müesse det si und min Itrittstest mache, wele ich mim Wunschlevel entsprechend bestande han. Yeyy.... oder viellicht doch nöd?! Die erst Schuelwuche isch recht stressig gsi, da d’Lehrer alles im Speedtempo duregnoh händ und ich mir en Erkältig vom lange flüge igfange han.

Am Mittwuch bini denn mit paar Lüüt vodä Schuel uf de Mount Eden. Das isch en chline Vulkan wo fürd Maori sehr heilig gsi isch. Uf all fäll d’Ussicht vo det isch de hammer (Fotos). Anschienend ghört alles, was mer vo det obe gseht, zu Auckland, was mega viel isch!

Am Fritig nach de Schuel isch es denn scho los gange! Min erste Trip mit de Organisation Kiwiana (wo mit de Schuel zäme schafft) zu de Bay of Islands! Die Region heisst «Bay of Islands», will sie umgebe isch vo ca. 140 Inslene. Mit em chline Bus simer nach Paihia gfahre, wo euse Backpacker gsi isch. Unterwegs hämer jedoch no paar interessanti Stops gmacht. Zersch bime Ort wos Uralti Kauri Trees hät. Die Bäum sind zwüsche 800-1400 Jahr alt und riiiiesig mit me dicke Stamm! Danach hämer die tolle WCs vom Hundertwasser beguetachtet. Ja richtig, mir sind extra det anegfahre um WCs fotografiere, isch das nöd struub? J

Am Samstig sind mir am morge früeh wieder los tuckeret mit em Ziel an nördlichste Punkt vo Neuseeland, en Ort called Cape Reinga. Das isch au de Punkt wos Tasmanische Meer und de Pazifisch Ozean ufenander treffen. En wunderschöne Ort und en geniale Ablick mit dem Liechtturm wo uf de Klippe staht. Euses Mittagesse händ mir denn ame Strand ganz idä nöchi vertilgt und mitme erfrischende schwum (oder eher Welle gumpe) im Meer abgrundet. Dänn simer zude Sanddüne gfahre, wo mir und einigi anderi gstoppt händ um mit em Surfbrett de Hügel durab rutsche. Das nennt sich «sand boarde», wobi mer nöd wie bim boarde uf em brett staht, sondern kopfvorah drufliegt und denn de Hübel durab saust! That was fun! Abgseh vom Hügel duruflaufe natürlich ;) wiiter mit em Bus isch es on Top of Ninety Miles Beach gange. Wo mir denn tatsächlich de ganz Strand, die jedoch «nur» 88 km, mit em Bus entlang gfahre sind. Das isch echt speziell gsi! De Strand isch wunderschön und endlos lang! Spannend isch, dass det Ebbe und Flut immer unterschieldich herrscht, also jede Tag änderets sich um 1h. De Bus chan also immer nur zunere gwüsse Ziit det dure fahre, bevor d’Fluet de Weg versperrt. «Ninety Miles Beach» händs ihn nur gnennt, wills besser tönt und will ihre Strand länger het müesse sie, als de in Australie J

Am Sunntig hämers dänn mal chli gmüetlich gno und sind mit de Fähre vo Paihia nach Russell gfahre. Det hämer s’Städtli agluegt und eus ame super schöne Strand unteren Baum gleit, relaxet, ice coffe trunke und en herrliche schwum im Meer (diesmal ohni grossi Welle) gmacht. Am Namittag isch es denn wieder retour nach Auckland gange, denn d’Fahrt het ungefähr 4 Stunde duuret.

Somit het mini erst Wuche mitme Tolle erste Usflug gendet und die zweit Wuche Schuel gstartet. Leider händ mir die Wuche die erste Prüefigs versüech (oder wie d’Jasmin mich korrigiert het: culture shock) gha, was immer für all Schüeler sehr Motivierend isch, da nämlich praktisch niemert bestaht! Echt total motivierend! Naja, de Kurs heisst nöd ume suscht Advanced, jetzt heissts wohl üebe üebe üebe...!

Dä Fritig, also morn, findet de big pub trip vo de Schuel us statt. Nimmt mich ja wunder, wie das usechunt ;) wird euch denn Bscheid geh...

Liebi Grüessli us Neuseeland