Neuseeland: Rotorua, Mt Maunganui, Taupo, Waitomo

Long weekend – 3 days in Rotorua

Kia ora ((Kiora) = hello, welcome, thank you – in Maori)
Min zweite Usflug isch nach Rotorua gange. Mir händ es langs Wuchenend gha, da de Mäntig en Fiirtig gsi isch. Und zwar isch das de Geburtstag vo Auckland (28.01). Gstartet hät de Trip wieder am Fritig nach de Schuel. Ich bin also so glücklich gsi und han mis Gepäck derfe mitumeschleppe! Jede morge de Hügel im Albert Park duruf isch ebe scho mega astrengend, vorallem wills da immer so typig isch. Da hani grad Sport für de Rest vom Tag gmacht, hihi :D

Uf jedefall simer denn am Namittag mit em Bus los nach Rotorua. Dank dem tolle traffic jam, will natürlich all fürs lange Wuchenend weg gfahre sind, hämer chli verspätig gha und sind denn total hungrig in Rotorua acho. Als erstes wenn mer in Rotorua achunt, wird mer vo dem wundervolle Duft in Empfang gno. De schwefligi Duft vo de aktive Vulkan. Rotorua isch nämli e Stadt uf aktivem Grund. Det acho hämer eus schnell id Zimmer vom Backpacker igrichtet und sind denn los uf Essensjagt! Mini kollegin und ich händ üs es super feins indisches Restaurant gfunde und de abig gnosse! Dazue ghört natürlich au es gläsli wii, mmh! Da mir grad so am gnüsse gsi sind und mir es langs Wuchenend vor eus gha hen, und nöd zvergesse, da mir in Neuseeland sind, häts eus in Club vo Rotorua verschlage. Was en super Glegeheit gsi isch, da de Club nur 5min vo eusem Backpacker entfert gsi isch und zudem händs grad en special evening gha mit life musig und cheap drinks! Het also nöd besser chöne sie. En Ma hät uf sinere Gitarre gspielt und gsunge, geniali Stimm, das isch wunderschön gsi – super Start is Wuchenend! Leider häts nöd all zu lan duret und die heimelig Atmosphäre hät sich id Disco umgwandlet! Das het denn aber au Spass gmacht, denn mir händ all eusi Fründe vodä Schuel det atroffe und zäme gfiiret und Tanzt.

Am nexte Morge isch es denn scho sehr frühe los gange. Mir händ de Morge und Mittag in Mt Maunganui verbracht. Das isch en total schöne Ort miteme chline Berg und zwei unterschiedliche Stränd uf beidne Siite. De eint Strand isch ruhig und somit eher für Familie und uf de andere Siite isch de Surfstrand. Mir händ das ganze mal vo obe welle gseh, darum simer de Mt Maunganui ufe gloffe. Ich bin so gschied gsi und han fürs Wuchenend nur mini Flipflops debi gha, chönd euch ja vorstelle, wie toll das gsi isch ;) es het sich aber meh als glohnt, die Ussicht isch traumhaft gsi, a dem heisse, sunnige Tag! Ufem Weg abwärts händ mir en wunderschöne Strand, grad unterhalb vom Berg, voller schöne Muschle entdeckt! Mir händ eus vor stuune nüm chöne erhole, doch eusi hungrige Büch und en Blick ufd Uhr hend eus denn wieder zrug is chline Städtli zoge, wo ich zum zweite mal (i mim Läbe) Sushi probiert han. Das isch nämli sehr beliebt da in Neuseeland und öpe s'günstigste Esse. Es isch uf all Fäll sehr lecker gsi. Danach hämer eusi Ziit im Bus verbracht, händ all Kollege wo en Aktivität buecht hend, abglade! Jaja, die Busfahrte sind scho recht erschöpfend gsi, jede het neumet anders hi müsse!

Mir händ eus denn entschiede, dass mir en Spaziergang rund um de blue lake machet. Das isch en See chli usserhalb vo Rotorua. Es isch sehr schön und agnehm gsi, da mir mehrheitlich Schatte gha hend und es nur gradus gange isch. De Wald det isch sehr speziell mit de Palmene, es fühlt sich ah als wer mer im Jungel! Am End vo dem chline Spaziergang hämer am See relaxt. Denn isch de Samstig au scho ume gsi und mir händ en organisierts BBQ mit eusere Truppe i eusem Backpackers Apartment gha. Und denn isch es wieder ab in Club :) (übrigens hät mer da fasch ständig BBQs – zumindest ich)

Am Sunntig isch es wieder frühe los gange, was au susch? Nur so zum festhalte, das isch denn keis Beschwere, isch ja recht, dass mir öpis gseh chönd und bi dene lange Busfahrte ersch recht!

Das mal hämer aber nöd wiit müesse fahre mir sind nämlich nach Wai-o-Tapu gfahre, en Ort wo voller brodelnde Vulkan isch. I dem Termal Wonderland händ mir denn e Tour chöne mache, durch all die heisse und prachtvoll farbige Gewässer. Die meiste sind ungefähr 100 Grad heiss. Nach dere Tour, was sicher öpe 1h duret het, simer zum Geysir gfahre. Jede Tag um die glich Ziit wird de zum Usbruch bracht und e grossi Menschemasse besammlet sich, wie ime Theater, nur um das Schauspiel für ganzi 5min z'beguetachte! Wiiter isch es nach Taupo gange, wo paar go bungy jumpe und anderi go jet boat fahre sind. Am See vo Taupe händ mir denn eusi Mittagspause verbracht. Am Namittag händ mini Kollegin und ich eus en Sprung is Wasser vom Green Lake erlaubt, was total frech gsi isch, da eusi Truppe en churze walk gmacht het, will euse Chaufeur eus öpis het welle zeige. Mir sind aber so müed gsi vo dem viele Busfahre das mir die Erfrischig bitter nötig gha händ. Es hät sich glohnt und isch sogar zur beste Entscheidig vom Tag ernannt wordä. Dä agnehm frischi See isch eifach super gsi! Zrug in Rotorua händ mir eus wieder es feins Restaurant usgsuecht! Und eimal meh isch es zum Club gange, doch dasmal hät euse Ufenthalt nur grad mal 10min duret, denn es isch fasch leer gsi, d'Musig isch nüm guet gsi und all eusi Fründe sind scho wiiterzoge. Au guet, somit händ mirs mal chli frühener is Bett gschafft ;)

De nexti Tag, scho Mäntig, het guet gstartet! Bi eusere nexte Destination acho, han ich mir doch glatt min Fuess liecht verstuucht oder so ähnlich. Plupp hets gmacht und d'Ananda isch am Bode glege. Das het sicher a mine Flipflops glege, die händ langsam gnueg vo mir gha – oder umgekehrt? Jedefalls hani denn de letzti Tag humpelnd verbracht. Z'aller erst händ mir d'Maori Village besichtigt. Rotorua isch nämlich au de Ort wo die Meiste Maoris lebet. Meistens sind sie chli abglege und abgrenzt vom Rest vode Iwohner. Die Tour isch sehr interessant gsi (Bilder hani leider no keini, da mini Kamera am Abig davor de Geist ufgeh het, also nur de Akku-Geist), mir händ chli en Iblick becho, wie sie det Läbet und chli vo dere witzige Sprach mitbecho. D'Maoris händ nämli kei schriftlichi Sprach gfühert, ihri Gschichte händ sie durch Tanz, Sprach und die bekannte Holzfigure usdruckt. Abgrundet het die Füherig e chlini Maori-Show mit Tanz und gesang. Das isch witzig gsi, sie strecket nämli oft Zunge use und riesset ihri Auge uf.

Euse letzti Halt isch bide Waitomo Gloworm Caves gsi. Waitomo, en Ort mit mehrere Hölene. I einere vo dene Hölene händ mir e chlini Tour gmacht. Zersch durch Tropfsteihööli mit Stalaktite und Stalagmite, denn zum Höhepunkt, de Glüehwürmli. Mit me Boot sind mir in dunkelheit durch d'Höli gfahre und händ ade Decki die viele härzig grüen lüchtende Glüehwürmli bewunderet. Es isch genial gsi, leider chli kurz, aber es hät sich glohnt! Es hät usgseh wie en Sternehimmel, ich het sie am liebste mit hei gnoh :) Danach isch es wieder zrug nach Auckland gange! Ende der Reise....

Kurz gseit, es isch super gsi, ich han e gueti Ziit gha und vieli schöni Iblick id Natur und Kultur vo Neuseeland gha!

PS: bitte nöd ufd Rechtschribig achte, ich han eifach mal chli Gross- und Klibuechstabe gstreut... mini Ziit da isch au chli beschränkt ;)

S'letzte Wuchenend bini mit minere Gastfamilie go Campe, das isch au super gsi! Meh davo wird denn no folge...